Բնապահպան Լևոն Գալստյանի կոշտ գրառումը Ռոբերտ Քոչարյանի մասին

Բնապահպան Լևոն Գալստյանը ֆեյսբուքյան իր էջում գրել է․

«Պատերազմի մեջ գտնվող երկիր լինելու փաստը որպես հանքեր շահագործելու արդարացում ներկայացնողները պետք է մինչև վերջ ազնիվ լինեն եւ խոսեն նաև այն մասին, թե ո՞նց ստացվեց, որ այդ նույն պատերազմող երկրի բոլոր հանքերի շահագործումը հարյուր տոկոսով տրվեց մասնավորին։

Եթե հիշողության հետ խնդիր ունեն կամ չգիտեն, ապա հիշեցնեմ, որ մինչև 2000 թվականը դրանք բոլորը պատկանում էին ժողովրդին (պետությանը)։ Հետո ամբաստանյալ Քոչարյանը հերթով վաճառեց բոլոր կոմբինատները․ Քաջարանի, Ագարակի, Կապանի, Զոդի, Ալավերդու, Ախթալայի և այլն։ Չե՞ք ցանկանում մի հատ քննություն անել եւ պարզել, թե այդ ինչպես դա արվեց, թե ինչպես ջրի գնով

ամեն ինչ հանձնվեց մասնավորին ու Հայաստանի Հանրապետության քաղաքացիներից ըստ էության խլվեց իրենց պատկանող ընդերքի հարստություններից իսկապես օգտվելու իրավունքը։ Դրանց շահագործումից մուծված եւ մուծվող հարկերը հիմնավորում չբերեք հանկարծ, որովհետև դա օրինակացված թալան է, որն իրականացվում է արդեն քսան տարի շարունակ։ Նույնն արվեց նաև խոշոր էներգետիկ համակարգերի հետ․ Սևան-Հրազդան կասկադ, Որոտանի կասկադ, Ձորահէկ, Հրազդանի ՋԷԿ, Երևանի Ջէկ և այլն։ Ցուցակն անվերջ է, էլ չշարունակեմ․․․ Բա սրա վերաբերյալ էլ խոսեք, հետ բերեք ժողովրդի սեփականությունն ու ամբողջ եկամուտներն ամբողջովին ուղղեք պետական գանձարան, այլ ոչ թե մասնավորի տված փշրանքներով մի կերպ յոլա գնացող պետություն կառուցեք։ Հիշեցնեմ, որ Հայաստանի անկախության հռչակագրի 7-րդ կետում ասվում է․

Հայաստանի Հանրապետության ազգային հարստությունը՝ հողը, ընդերքը, օդային տարածությունը, ջրային և այլ բնական պաշարները, տնտեսական, մտավոր, մշակութային կարողությունները, նրա ժողովրդի սեփականությունն է: Դրանց տիրապետման, օգտագործման ու տնօրինման կարգը որոշվում է Հայաստանի Հանրապետության օրենքներով:

Բա փոխեք այն բոլոր օրենքները, որոնք չեն բխում ՀՀ քաղաքացիների ու պետության շահերից՝ չէ ո՞ր մենք պատերազմող երկիր ենք»։

Մեկնաբանել

Կայքն օգտագործում է թխուկներ: